ITALI – Policia italiane vuri në pranga tre shtetas shqiptarë, të cilët akuzohen për vjedhjen e një traktori “John Deere”, që kap vlerën e 100 mijë eurove.
Sipas mediave italiane, tre të rinj shqiptarë, të moshës 23, 27 dhe 28 vjeç, u ndaluan nga policia rreth orës 02:30 të mëngjesit të së hënës, për një kontroll në Fossalta di Portogruaro, teksa udhëtonin me një “Passat” me targa italiane.
Policia kishte nisur kontrollet pas denoncimit të një fermeri, të cilit i kishin vjedhur traktorin rreth mesnatës. Kur janë pyetur nga policia, shqiptarët kanë thënë se nuk kishin lidhje me ngjarjen, por gjithsesi ata u shoqëruan në komisariat për verifikime të mëtejshme.
Teksa hynin në komisariat, njëri prej shqiptarëve ka hedhur në tokë çelësat e traktorit të vjedhur, por u pikas nga punonjësit e policisë. Sipas mediave italiane, çelësat korrespondonin me traktorin e vjedhur “John Deere”.
Ndërkohë, në makinën tip “Passat” me të cilën udhëtonin shqiptarët, policia gjeti në kronologjinë e “Google Maps”, koordinatat e një zone të izoluar, në Chions Villa, Friuli, ku shqiptarët kishin fshehur traktorin e vjedhur.
(er.nu/BalkanWeb)
