Donald Trump nuk e përjashton mundësinë për kandiduar edhe për një mandat të tretë si President i SHBA. Edhe pse Kushtetuta e SHBA e ndalon.

Shefi i Shtëpisë së Bardhë, në një intervistë për NBC deklaroi se ka mënyra për t’ia dalë në realizimin e qëllimit të tij.

Trump u rrek të tregohej bindës kur tha se e kishte seriozisht ambicien e tij e cila do ta bënte atë të parin President në historinë e SHBA me tre mandate.

“Shumë njerëz po më kërkojnë ta bëj”, tha ai, duke iu referuar mbështetësve të tij. Dhe ai vazhdoi: “U them se kemi një rrugë të gjatë për të bërë, jemi ende në fillim të mandatit, tani jam i fokusuar te mandati”.

Ai përmendi gjithashtu vlerësimet e tij në sondazh, duke thënë se “shumë njerëz do të dëshironin që ai të qëndronte në detyrë” për një mandat të tretë.

Kur u pyet nga gazetari nëse donte një mandat të tretë, Trump u përgjigj: “Më pëlqen të punoj. Nuk po bëj shaka”.

Çfarë thotë Kushtetuta

Amendimi i Kushtetutës për të eliminuar kufirin e dy mandateve do të ishte jashtëzakonisht i vështirë, pasi do të kërkonte ose dy të tretat e Kongresit ose dy të tretat e shteteve që bien dakord për të mbledhur një konventë kushtetuese për të propozuar ndryshime.

Sido që të jetë, atëherë do të kërkonte ratifikimin nga tre të katërtat e shteteve.

Procesi nuk ka afat kohor dhe mund të përfundojë brenda shumë viteve. Amendamenti i 22-të, i cili vendosi dy mandate, u miratua nga Kongresi në 1947 dhe nga shtetet dhe nuk u bë pjesë e Kushtetutës deri në vitin 1951.

(BalkanWeb)