Donald Trump kundërshton akuzën e Harris se kandidati republikan ka bërë komente pozitive për Hitlerin. Në një podcast tre-orësh me ish-komedianin dhe komentatorin MMA Joe Rogan, kandidati republikan për President komentoi pretendimet e zv. Presidentes Kamala Harris, se kishte folur pozitivisht për vrasësin masiv nazist Adolf Hitler.

“Kamala ka një IQ shumë të ulët. E dini, edhe unë jam pro bërjes së testeve. Unë mendoj se të gjithë ata që kandidojnë për president duhet të bëjnë një test”, tha Trump.

Ai e cilësoi si “qesharake” akuzën se një qasje e tillë ishte antikushtetuese. “Unë mendoj se Kamala duhet të bëjë një test sepse diçka mungon. Ka diçka që nuk shkon me të”, theksoi Trump.

Gjatë fushatës zgjedhore në SHBA, Harris tregoi historinë e ish-shefit të kabinetit të Trump, John Kelly, sipas të cilit republikani kishte bërë komente pozitive për Hitlerin në disa raste. Gjatë kohës së tij në Shtëpinë e Bardhë, ai thuhet të ketë thënë se i duheshin “gjeneralë siç kishte Hitleri”. Harris gjithashtu e përshkroi Trumpin si “të çmendur” dhe një fashist dhe që përpiqet për “pushtet të pakufizuar”.

Nuk ishin vetëm republikanët ata që kritikuan deklaratat e Harris. Kryetari demokrat i Nju Jorkut, Eric Adams, gjithashtu beson se kjo është e gabuar. Kur u pyet nëse ai gjithashtu mendonte se Trump ishte fashist, Adams u përgjigj: “Jo. Unë e di se çfarë bëri Hitleri dhe e di se si duket një regjim fashist”.

I mbijetuari i Holokaustit, Jerry Wartski, gjithashtu e dënoi ashpër Harrisin.

“Unë di më shumë për Hitlerin sesa Kamala Harris do të dijë ndonjëherë në një mijë jetë. Akuzimi i saj ndaj Presidentit Trump se është si Hitleri është gjëja më e keqe që kam dëgjuar në 75 vitet që kam jetuar në Shtetet e Bashkuara. Ajo u detyrohet prindërve të mi dhe të gjithë të tjerëve që u vranë nga Hitleri, një falje për përsëritjen e kësaj gënjeshtre”, tha ai.