Hungaria i ka kërkuar Parlamentit Evropian heqjen e imunitetit të Ilaria Salis, eurodeputetes italiane, e cila u burgos në Hungari me akuzën e sulmit ndaj aktivistëve të krahut të djathtë.

Tema u ngrit nga eurodeputetët hungarezë nga partia e kryeministrit Viktor Orbán, Fidesz, gjatë një seance plenare në Strasburg.

Presidentja e Parlamentit Evropian Roberta Metsola tha se kërkesa e Hungarisë i është përcjellë Komisionit të Çështjeve Ligjore të Parlamentit, ku do të shqyrtohet.

Salis u dënua për tre akuza për tentativë sulmi ndaj demonstruesve të ekstremit të djathtë gjatë një proteste në Budapest në shkurt 2023 – një akuzë që ajo e ka mohuar vazhdimisht.

Ajo kaloi 15 muaj në burg në Budapest para se t’i jepej arresti shtëpiak. Më pas asaj iu ofrua lirim automatik dhe imunitet pasi u zgjodh si eurodeputete për Aleancën e Gjelbër të Majtë pas zgjedhjeve të Parlamentit Evropian në qershor.

Ish-mësuesja ndezi një grindje diplomatike midis Hungarisë dhe Italisë pasi ajo u fotografua duke ndjekur gjykatën në Budapest me duart dhe këmbët e lidhura me zinxhirë në janar 2024 – një praktikë që Hungaria këmbënguli se ishte standarde.