Lideri i opozitës Sali Berisha ka hedhur akuza të forta ndaj kryeministrit Edi Rama duke deklaruar se qasja e tij ndaj Erion Veliaj ishte sjellje tipike e ekstremit të majtë, e mafiozëve.

Megjithëse, tha Berisha, ai e meritonte, implikimi i të gjithë kupolës së PS pasi ai ishte burgosur dhe arrestuar, duke e politizuar në këtë shkallë një akt të tillë, “është dëshmi, është tipar i ekstremit të majtë, i forcave politike të ekstremit të majtë ose i mafiozëve”

“Tani u arrestua, ishte në gjykim, ky merrej me statuset e tij. Absolutisht po. Ky i çonte Ulsiun, organizonin truk pas truku vetëm e vetëm se si ta shpërbënin totalisht në mënyrë që të mos denonconte. Por natyrisht socialistët këto i kanë kuptuar që ai listën që ka në Tiranë, i ka armiq.Grupi Xhafaj është grupi armiqësor. Po, haptas. Është grupi armiqësor. Se këta në këto koncepte ecin”, tha Berisha.

Sipas kreut të PD, kjo situatë është kudo, në të gjitha qarqet. Berisha tha se në garë është bota e krimit.

“Ndaj dhe misioni ynë bëhet çdo ditë e më i rëndësishëm. Secili nga ne duhet ta ketë të qartë se fitorja buron nga ndërgjegjësimi i qytetarëve.

Aftësia jonë për të ndërgjegjësuar qytetarët për programin që paraqesim para shqiptarëve është vendimtare. Dhe unë u them juve që ky është programi më i mirë që është hartuar ndonjëherë për shqiptarët dhe për Shqipërinë. Fitorja kalon në fuqinë tonë organizative.

Fuqinë organizative të fushatës, fuqinë organizative të ditës së votimit, të qendrës së votimit”, tha kreu i PD, Sali Berisha.

(BalkanWeb)