KOSOVË- Policia e Kosovës ka njoftuar përmes një komunikate se gjatë ditës së sotme ka ndaluar pesë persona në qytetin e Mitrovicës, në lidhje me një rast që është duke u hetuar. Mediat vendore në Kosovë kanë publikuar lajmin se “anëtari i kryesisë së Aleancës për Ardhmërinë e Kosovës, Muhamet Kelmendi është ndaluar”.
Në komunikatën e policisë thuhet se ndër të ndaluarit është edhe zoti Kelmendi, por ai në polici “është shoqëruar në cilësinë e dëshmitarit”.
Ndërkohë vetë Kelmendi, ka folur për arrestimin e tij nga Policia e Kosovës. Ai është intervistuar me telefon nga gazetari i “Klan Kosova”, Kushtrim Sadiku. “Ndodhi një spektakël politik që unë nuk e kam pritur nga Policia e Kosovës dhe Ministria e Brendshme. Me të mbërritur në Mitrovicë, as dy minuta nuk ka zgjatur kur njësitet speciale m’u kanë drejtuar sikur të isha një kriminel i madh. Ata më kanë pyetur nëse e njoh një person, student në Universitetin AAB. Më kanë thirrur në cilësinë e dëshmitarit”, ka thënë Kelmendi.
“Profesor Muhamet Kelmendi u ndalua befas, me pretekst krejt të pakuptimtë për veprimtarinë e tij, derisa po udhëtonte në Boletin, në ceremoninë e rivarrimit të eshtrave të Heroit të Kombit Isa Boletini”, thuhet në komunikatën e AAK-së.
Sipas raportimit të “KlanKosovës”, Muhamet Kelmendi është liruar nga mbajtja në Policinë e Kosovës.
Muhamet Kelmendi në fillim u raportua se u arrestua si i dyshuar për një aksion terrorist në Veri të Mitrovicës, por që në komunikatën e Policisë së Kosovës thuhet se ai është arrestuar si dëshmitar dhe është intervistuar.
(m.k/BalkanWeb)