Deputeti i PD Tritan Shehu, që kandidon për deputet për Koalicionin Shqipëria Madhështore në qarkun e Gjirokastrës, i ftuar në News 24, foli për ushqimet e kontaminuara në vendin tonë.
Shehu tha se është shkatërruar siguria ushqimore në vend. Ai shtoi se salmonela është e rrezikshme deri për jetën e njeriut. Shehu vlerësoi se nëse PD do të jetë në pushtet, AKU do të jetë institucion në varësi të Ministrisë së Shëndetësisë.
“Është shkatërruar siguria ushqimore. Kjo lidhet me korrupsionin, që përfshin qeverinë dhe shtetin. Së dyti, lidhet me patronazhistët, që janë të paaftë dhe mosserioziteti i punës. Ne kemi cilësinë më të ulët medikamenteve dhe ushqimet janë ndër më të lartat në Europë. Për cilësi më të ulët të ilaçeve dhe ushqimeve, kemi çmimet më të larta. Salmonela është e rrezikshme deri me jetën e njeriut. Simptomat janë temperaturat e larta, gjendet e rënda toksike, të fikëti, nis dehedradimi i thellë, që mund të japë edhe shok toksik. Nuk ekziston siguria ushqimore në Shqipëri. Sistemi i kontrollit ushqimor duhet t’i kalojë Ministrisë së Shëndetësisë dhe Bujqësisë. AKU duhet të kalojë pranë Ministrisë së Shëndetësisë. Duhen realizuar kontrolle të vërteta. Korrupsioni ka gërryer institucionet tona. PS ia hapi rrugën medikamenteve të skaduara. PS përzuri shoqëritë më serioze të farmacive. Sistemi i shëndetësisë sot është me parullën “paguaj ose vdis””, tha Shehu.
Më tej, Shehu foli për kandidimin e tij në Gjirokastër. Ai tha se qarku i Gjirokastrës është braktisur masivisht, duke shtuar se duhet të rikthehet jeta normale në këtë vend.
“Gjyshi im ka qenë gjykatës në Gjirokastër, kam rrënjët e mia familjare nga ajo zonë. Qarku i Gjirokastrës është ndër qarqet më fisnike, që ka luajtur rol të madh në historinë e vendit dhe është braktisur sot. Kanë ikur mbi 40 përqind e popullsisë. Duan të mbyllin Universitetin e Gjirokastrës. Në Këlcyrë ka errësirë të plotë, edhe në Tepelenë njësoj, edhe në Gjirokastër. Duan ta zbrazin Gjirokastrën. Ne duam një Shqipëri që shqiptarët të mendojnë të jetojnë në këtë vend. Shqiptarët duhet të votojnë PD-në, për një jetë normale”, përmbylli Shehu.
(Balkanweb)
