Pekini ka nisur stërvitjet e përbashkëta të ushtrisë, marinës, forcave ajrore dhe raketave rreth ishullit të Tajvanit, njoftoi të hënën një zëdhënës ushtarak.

Stërvitjet e kombinuara do të testojnë aftësitë e përbashkëta të forcave kineze dhe do të shërbejnë si një paralajmërim për forcat separatiste tajvaneze në ishull, tha kapiteni i lartë Li Xi, një zëdhënës i Komandës së Ushtrisë Çlirimtare Popullore (PLA).

“Më 14 tetor, Komanda e Teatrit Lindor të PLA po dërgon trupat e saj të ushtrisë, marinës, forcave ajrore dhe raketave për të kryer stërvitje të përbashkëta ushtarake të koduara “Shpata e Përbashkët-2024B” në ngushticën e Tajvanit dhe zonat në veri, jug, dhe në lindje të ishullit Tajvan”, njoftoi Li.

Anijet dhe avionët do t’i afrohen Tajvanit nga drejtime të ndryshme, duke lejuar forcat e ndryshme të praktikojnë koordinimin. Stërvitjet do të fokusohen në “patrullat e gatishmërisë luftarake detare-ajrore, bllokadat e porteve dhe zonave kryesore, sulmet ndaj objektivave detare dhe tokësore, si dhe kapjen e përbashkët të epërsisë gjithëpërfshirëse, testimin e aftësive të operacioneve të përbashkëta të trupave të komandës së teatrit” . thuhet në deklaratë.