NGA:KLODIANA LALA*TIRANE- Një administrator shtetëror do të administrojë në masën 60 për qind televizionin “Agon Channel”, pasi aksioneri kryesor i tij, biznesmeni italian Françesko Beketi, po hetohet si i përfshirë në një skemë pastrimi parash, bashkë me nënën e tij, Liliana Condomitti dhe disa persona të tjerë. Në vendimin e sekuestrimit preventiv të kompanive të Beketit dhe të personave të tjerë të dyshuar si të përfshirë në këtë skemë, siç janë Liliana Condomitti dhe Mauro De Renzis, thuhet se për ekze-kutimin e vendimit dhe administrimin e pasurive që do të sekuestrohen ngarkohen administratorët e Agjencisë së Administrimit të Pasurive të Sekuestruara e të Konfiskuara.
Konkretisht, Gjykata e Tiranës ka vendosur sekuestron mbi shoqëritë “Energji” shpk, “Cable System” shpk, “400 KV”, shoqërinë “Fuqi” dhe “Agonset”, vendim që është pasqyruar edhe në faqen zyrtare të Qendrës Kombëtare të Regjistrimit, çka sipas ligjit, aksionerët e këtyre shoqërive nuk mund të bëjnë asnjë shitblerje të aksioneve. Ndërkaq, sa i përket administrimit të televizionit, Agjencia e Administrimit të Pasurive të Sekuestruara e të Konfiskuara, ka caktuar një administrator, i cili brenda afatit ligjor, në bashkëpunim me një përmbarues gjyqësor, duhet të marrë në administrim 60 për qind të të gjitha aseteve të televizionit. Në rastin konkret, ende nuk është e qartë nëse mund të procedohet me ndërprerjen e transmetimit, por kjo ka pak gjasë të ndodhë, pasi pjesën tjetër të aksioneve të televizionit e kanë në pronësi aksionerë të tjerë, të cilët nuk janë nën hetim.
Sa u përket hetimeve për biznesmenin Beketi, ndaj të cilit ka një urdhër arresti të firmosur ndaj tij, mbi bazën e të cilit është bërë dhe shpallja në kërkim ndërkombëtar, hetimet vijojnë dhe tashmë prokuroria është në pritje të disa letërporosive nga disa shtete të huaja, mes tyre dhe Italia, nëpërmjet të cilave është kërkuar informacion për burimin e parave të Françesko Beketit, financimeve të kryera prej tij, si dhe për personat e bashkëlidhur me të. Prokuroria po heton mbi aktivitetin e shoqërive të Beketit, për të cilin dyshon se ka kryer pastrim parash. Sipas organit të akuzës, në qendër të skemës së mashtrimit qëndrojnë hidrocentrali i Kalivaçit dhe dy shoqëri të zotëruara nga italiani Beketi.
Bëhet fjalë për “Kalivac Green Energy” dhe “Energji”, ku kjo e fundit ka blerë punime nga nënkontraktorë privatë dhe më pas, duke shumëfishuar artificialisht çmimet ia ka shitur sërish “KGE”-së. Mandej thuhet në dosjen e prokurorisë, se kompania ka rritur në mënyrë fiktive kreditimin e TVSH-së, duke mashtruar shtetin dhe duke përfituar miliona. Ndërkohë, në vitin 2013, dy kompanitë që zotëroheshin ‘de facto’ nga Beketi, kanë krijuar një “konflikt” që i ka çuar palët në Gjykatën e Arbitrazhit, para së cilës provohet se janë paraqitur dokumente të falsifikuara. Sipas prokurorisë, ky konflikt u sajua për të shmangur konfliktin real që Beketi kishte me bankën e njohur “Deutche Bank”, partnere në ndërtimin e Kalivaçit, interesat e së cilës janë dëmtuar.
(ed.me/Gazeta Shqiptare/BalkanWeb)
