TIRANË- Lideri i Partisë, Demokratike Lulzim Basha ka reaguar për vendimin e Gjykatës së Lartë, e cila dënoi me gjobë dy opozitarët Edi Paloka dhe Arben Ristani për shpifje ndaj kryeministrit Edi Rama. Basha shkruan në faqen e tij të Facebook se ky vendim është i papranueshëm për opozitën dhe se është fakt i njohur që Edi Rama është i lidhur me krimin.


“Është fakt i njohur botërisht që Edi Rama është lidhur kokë e këmbë me krimin. Kryeministri aktual është njeriu që solli në parlament me firmën e tij, dhjetëra deputetë të lidhur me rekorde kriminale. Është fakt i njohur botërisht që ai përdori kontratën me krimin, si një instrument për të fituar pushtetin, si një instrument që po e përdor sot sërish për të mbajtur pushtetin. Asnjë alibi nuk e shpëlan Edi Ramën nga dosjet dhe lidhjet e tij me krimin, dosje të cilat partnerët tanë ndërkombëtarë ia kanë përplasur në tryezë”, shkruan Basha.


Më tej kreu i opozitës deklaron se Rama është mbrojtësi më i flaktë i personave me rekorde kriminale në parlament.


“Është fakt i njohur botërisht që Edi Rama ka qenë dhe mbetet mbrojtësi më i flaktë i personave me rekorde të tmerrshme kriminale në parlament dhe në listën e tij të kandidatëve vendorë. Sepse Edi Rama ka refuzuar dhe refuzon të zgjidhë kontratën me krimin”, thotë ai.

Basha e akuzon kryeministrin se i ka bërë presion drejtësisë, çka sipas tij solli vendimin e sotëm. “Presioni i paprecedent, që ai i ka bërë sistemit të drejtësisë me qëllimin e vetëm për të mbuluar kontratën e tij me krimin, solli që sot drejtësia të japë një vendim të papranueshëm pasi kishte refuzuar më parë të merrte në shqyrtim prova, fakte dhe dëshmitarë që hedhin dritë mbi lidhjet e Edi Ramës me krimin. Vendimi i sotëm është i papranueshëm për opozitën që ka kërkuar dhe kërkon dekriminalizimin e politikës”, thekson kreu i PD-së.

Në përfundim lideri i të djathtëve deklaron se “Partia Demokratike mbetet e vendosur të mos komentojë asnjë vendim gjyqësor, por nuk hesht dhe nuk ka për të heshtur derisa lidhjet e krimit me politikën të priten. Derisa lidhjet e kryeministrit me mafien të këputen. Kush mendon të kundërtën, gabon rëndë”.

 

(m.k/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: