Zëdhënësja e Ministrisë së Punëve të Jashtme të Rusisë, Maria Zakharova, ka deklaruar sot se Perëndimi është përgjegjës për dështimin e normalizimit dhe krizën në Kosovë, sipas saj, të nxitur nga Prishtina.

Ajo shprehu solidaritetin me serbët që jetojnë në Kosovë dhe u bëri thirrje organeve ndërkombëtare që veprojnë në zonë që “të përmbushin siç duhet mandatet e tyre të marra në bazë të Rezolutës 1244 të Këshillit të Sigurimit të OKB-së “.

“Përgjegjësinë e plotë për dështimin e normalizimit dhe krizën e nxitur nga Prishtina e kanë vendet perëndimore”, ka shtuar zëdhënësja e ministrisë ruse, duke komentuar bllokadën e fundit të objekteve të institucioneve serbe në katër komuna në veri të Kosovës.

Zakharova pretendoi se gjatë bastisjes, policia e Kosovës përdori forcë joproporcionale, sekuestroi sende, dokumentacion dhe pajisje zyre dhe “shfuqizoi qasjen e serbëve në shërbimet bazë në vendbanimin e tyre”.

“Përfaqësuesit e misionit të BE-së në fushën e sundimit të ligjit në Kosovë “në mënyrë rutinore, pa ndërhyrje, vëzhgojnë se çfarë po ndodh. Kryeqytetet perëndimore vetëm me ngurrim qortuan repartet e tyre në Prishtinë për ‘mungesë koordinimi’ dhe edhe një herë e bënë të qartë se ata nuk e vënë në dyshim ligjshmërinë e persekutimit të serbëve”, tha ajo.