Një destinacion turistik gjithmonë i preferuar nga turistët, Dardha nuk e humb hijeshinë e saj as në vjeshtë. Një terren i jashtëzakonshëm malor me pemët shumëngjyrëshe dhe atmosfera e mrekullueshme që shoqëron këtë fshat nga mikpritja e dardharëve, ofrojnë një atraksion vjeshtak tepër të preferuar për turistët, por edhe të apasionuarit sporteve dhe natyrës.
Të shoqëruar nga një çiklist shqiptar, dy turistë të ardhur nga Amerika dhe Spanja përshkuan me biçikletë rrugën Dardhë-Korçë. Ata ndajnë eksperiencat e tyre nga ky udhëtim.
‘Jam nga Shtetet e Bashkuara te Amerikës dhe kam ardhur në Dardhë për të takuar disa miq shqiptarë. Në Dardhë kam kaluar 3 ditë të mrekullueshme çiklizmi, e shijoj shumë shëtitjen me biçiklete këtu. Kam takuar njerëz të mirë, shumë mikpritës, moti është i mrekullueshëm, natyra mbreslënese. Jam shumë i kenaqur nga atmosfera dhe të gjitha mundësitë që Dardha të ofron.’-thotë një turist.
‘Jam nga Madridi, kam ardhur të takoj Gentin, mikun tim shqiptar. Korça dhe Dardha janë shumë të bukura, natyra është e mrekullueshme, pemët me gjethet shumëngjyrëshe në vjeshtë e bëjnë akoma edhe më të bukur këtë vend. Kam qenë edhe më parë në Shqipëri dhe u riktheva sërish. Infrastruktura rrugore ka qenë jo fort e mirë, por tani është përmirësuar. Mund ta pershkosh këtë rrugë më me lehtësi dhe njerëzit mund të zbulojnë vende dhe gjëra të mrekullueshme.’-deklaron një turist tjetër nga Spanja.
Të udhëtosh drejt Dardhës duhen vetëm 20 km nga Korça dhe në mbi 1350 m lartësi arrin të shohësh këtë mrekulli që të fal mesvjeshta me ngjyrat që frymëzojnë edhe shumë artistë.
Tryeza dardhare ofron një larmishmëri gatimesh tradicionale, përgatitur nga amvisat e zonës. Një prej tyre na tregon disa nga pjatat që kërkohen dhe pëlqehen më shumë, si dhe sekretin përse Dardha është gjithnjë në fokus të vizitorëve.
Përveç ngjyrave dhe klimës, gatimet tradicionale, bukuritë e tjera të fshatit dhe mikpritja dardhare e bëjnë këtë vend ndër më të vizituarat në çdo stinë të vitit, tashmë jo vetëm nga turistët vendas, por edhe të huaj.
