Prokuroria e Posaçme dhe Njësia e Operacionales zbuluan mbrëmjen të premtes një bazë që përdorej nga grupet e trafikut të kokainës, në lagjen e VIP-ave të “Kodrës së Diellit 2”, në Tiranë. Më herët ishte zbuluar një laborator droge në fshatin Qerekë të Fushë Krujës, gjatë megaoperacionit antidrogë. Gjatë këtij operacioni janë sekuestruar disa kg lëndë narkotike e llojit kokainë dhe përzierës. BalkanWeb dhe News24 sollën pamjet ekskluzive të vilës që sipas SPAK përdorej nga trafikantët.
Ndërsa numri i të arrestuarve deri tani raportohet të jetë 5 persona, njëri prej të cilëve nga Venezuela. Arrestime janë kryer në fshatin Vishnje në Njësinë Administrative Baldushk, ndërsa paralelisht aksioni antidrogë ka vazhduar edhe në fshatin Ibë e Mullet.
Ndërkohë në mesnatë operacioni u fokusua sërish te lagjja e VIP-ave në Tiranë, “Kodra e Diellit 2”. Gazetari Igli Çelmeta raportoi se ka dyshime për të tjera ambiente të përdorura nga grupi kriminal në këtë zonë, të ngritura në vilat luksoze që dominojnë këtë lagje. Disa shtëpi janë kontrolluar dhe po vijon bastisja edhe në banesa të tjera.
Grupi kriminal ndërronte vazhdimisht banesat, kjo për të shmangur rënien në sy dhe humbur gjurmët. Operacioni mbrëmjen e kësaj të premte u zhvillua në disa zona si Kavajë, Shkozet, Vorë, Kamëz, Qerek dhe Tiranë te Kodra e Diellit.
(BalkanWeb)
