Ambasadori i Gjermanisë, Karl Bergner dhe ambasadorja e Francës, Catherine Suard, nga Korça ku morën pjesë në ceremoninë e përvitshme të “Përkujtimit të Armëpushimit”, të 11 Nëntorit 1918, në fundin e Luftës së parë Botërore, ku u nderuan 640 ushtarë të rënë, komentuan situatën politike në Shqipëri.

Diplomatët e huaj të akredituar në Tiranë dhanë edhe një prononcim për mediat, ku folën dhe ndanë mendimet e tyre për zgjedhjet e ardhshme dhe punën e drejtësisë.

Ambasadori Gjerman Karl Bergner u pyet se sa do të ndikojë standardi i zgjedhjeve të afërta elektorale të vitit 2025, për proceset integruese të Shqipërisë në BE.

“Ne i mirëpresim hapat e fundit që janë marrë nga ana e qeverisë. Mendoj që është një tregues i fortë për besimin që do kenë shtetet anëtare të BE ndaj Shqipërisë. Një kapitull është hapur dhe priten që të hapen edhe kapituj të tjerë në të ardhmen që do të thotë negociatat e vërteta do të fillojnë dhe ky proces transformimi që Shqipëria po i nënshtrohet, përforcimi i vlerave europiane do të vazhdojë të thellohet. Ne vlerësojmë punën që ekipi shqiptar ka bërë deri tani”, tha ambasadori gjerman, Berger.

Sa i takon arrestimeve në nivele të larta të politikës që ka bërë SPAK, ambasadori gjerman u shpreh: “Qëndrueshmëria e institucioneve të fuqishme, jo vetëm SPAK por edhe institucione të tjera ligjzbatuese, është pjesë e transformimit të aksesit në BE. Ne e mbështesim dhe e vlerësojmë punën e SPAK në këtë aspekt”.

Edhe ambasadorja franceze komentoi hapat e Shqipërisë drejt BE dhe punën e SPAK.

“Ashtu siç e theksoi presidenti Macron në vizitën e tij në Shqipëri, jemi të lumtur për hapat e Shqipërisë në BE dhe jemi të bindur që ato do vazhdojnë. Procesi i integrimit është i rëndësishëm transformimi i shoqërisë shqiptare. Në këtë proces transformimi, Franca dhe Gjermani u japim ndihmë. Besoj se jemi dakord që ne mbështesim punën e SPAK, BE e mbështet në punën e rëndësishme që po bën“, tha Catherine Suard.

(BalkanWeb)