Eksperti i pensioneve Kujtim Hoxha, i ftuar në rubrikën “Çështja e Ditës” në News24 tha se nevojat e pensionistëve janë shumë më të mëdha se sa paratë që marrin me pensionin e indeksuar.

Hoxha theksoi se qeveria duhet të rrisë akoma më tepër masën e indeksimit të pensioneve.

Ai shtoi se duhet që më shumë persona të futen në skemën e sigurimeve, pasi vetëm kështu mund të ketë një balancë mes atyre që derdhin sigurime dhe pensionistëve.

Kujtim Hoxha, ekspert pensionesh: Në fundvit pritet që të jepen afër 8000 lekë shpërblim. Nevojat e pensionistëve janë shumë herë më të mëdha sesa ata marrin pension, edhe i indeksuar. Qeveria duhet të rrisë akoma më shumë masën e indeksimit. Me bonusin, në fundvit çdo pensionist pritet që të marrë 8000 lekë. Por kjo është kockë në gojën e pensionistëve, për t’i joshur në të ardhmen. Me paratë e indeksimit, i bie që në qytet pensionisti një ditë të pijë kafe e një ditë mos të pijë. Kurse në fshat, pensionisti me paratë shtesë që ka marrë nga indeksimi, mund të marrë një kafe në 2.5 ditë.

Pensionistët edhe në të ardhmen nuk duhet të kenë shumë shpresa. Duhet të rritet numri i kontribuesve, që të shkojë së paku 150 me 100. P.sh pensionisti mund të marrë pension edhe të punojë. Pse thotë që unë si pensionist të hedh kontribute dhe mos të më njihen? Duhet të njihen. Gjithashtu, punëdhënësi duhet të marrë pagën reale. Ka rrugë, për të grumbulluar të ardhura.

(Balkanweb)