Për të ndalur Interin në këtë sezon të Serie A duhej një Juventus në versionin e tij më të mirë. “Zonja e Vjetër” triumfoi 2-1 në shtëpinë e rivalëve të përjetshëm dhe për herë të parë në këtë edicion të kampionatit italian merr kryesimin e renditjes me një pikë më shumë se zikaltërit.
Një sukses i merituar për skuadrën e Maurizio Sarri, që kaloi në epërsi me Dybala që në minutën e 4-rt.
Të besuarit e Antonio Conte reaguan shpejt. Sistemi VAR konfirmoi 11-metërshin për prekje të topit me dorë nga De Ligt dhe në minutën 18-të, Lautaro Martinez barazoi rezultatatin me goditjen e tij të saktë. Kaq për pjesën e parë, ndërsa pavarësisht përpjejeve shifrat mbetën të pandryshuara deri në minutën e 80-të. Një aksion i gjatë që mishëron idetë e trajnerit Sarri nxorri përpara portës Higuain. Preciz sulmuesi argjentinas që realizoi golin e dytë dhe të fitores për Juventusin tashmë i vetëm në krye të klasifikimit. Në vendin e tretë të renditjes ngjitet Atalanta.
Një realitet i futbollit italian, skuadra bergamaske shpërbleu parashikimet, duke mundur me lehtësi në shtëpinë e saj 3-1 Lecce. Nuk arrin të ruajë ritmin Napoli, që nuk shkoi më shumë se barazimi pa gola në transfertën e Torinos.
Një ndalesë e fortë për formacionin e drejtuar nga Carlo Ancelotti, që largohet më shumë nga gara për titullin kampion. Një fundjavë të tensionuar kaloi Roma, që barazoi në “Olimpico” 1-1 përballë Cagliari.
Verdhekuqtë protestuan gjatë në fundin e ndeshjes, pas golit të Kalinic të anuluar nga arbitri për një shtyrje të sulmuesit brenda zonës. Nuk bëri më mirë as Lazio, që nga fusha e Bologna doli me një pikë pas barazimit 2-2.
Sfida u vendos e gjitha në pjesën e parë, ndërsa Correa mund t’i jepte më shumë skuadrës laciale nëse nuk do të gabonte nga pika e penalltisë vetëm dy minuta nga fundi I kohës së rregullt.
Më në fund feston edhe Milan. Pas tre humbjeve radhazi, skuadra kuqezi u kthye te suksesi të shtunën në mbrëmje, kur mundi në transfertë 2-1 Genoa në një sfidë me të vërtetë dramatike.
(balkanweb)
