Viti 2025 ka nisur me një seri ngjarjesh ekstreme të motit në mbarë globin, ku stuhitë, reshjet intensive dhe përmbytjet kanë shkaktuar dëme të mëdha materiale dhe dhjetëra viktima.
Në Irlandën Jugore, një nga stuhitë e para dimërore solli reshje dëbore, ndërsa në Angli, moti ekstrem paralizoi aeroportin e Mançesterit duke mbyllur të dy pistat. Më pas, reshjet e dendura të shiut përmbytën disa zona të vendit.
Në SHBA, stuhia e parë e madhe dimërore për vitin e ri goditi më 6 janar rajonet e Atlantikut të Mesëm, duke mbyllur shkollat dhe institucionet publike në Uashington D.C. Në disa shtete, si Kansas, Kentaki dhe Maryland, u shpall gjendje e jashtëzakonshme. Reshjet e dëborës arritën deri në 30 cm. Më vonë gjatë janarit, një tjetër stuhi solli borë deri në jug të Floridas, Teksas dhe Luiziana.
Më 24 janar, stuhia Eowyn goditi me forcë Irlandën dhe Irlandën e Veriut, me erëra deri në 183 km/h – shifra që theu një rekord 80-vjeçar. Një person humbi jetën, ndërsa rreth një e treta e vendit mbeti pa energji elektrike. Qindra fluturime u anuluan.
Vetëm tre ditë më vonë, stuhia Herminia goditi Francën Perëndimore, duke shkaktuar përmbytje të mëdha. Një marinar britanik u shpall i humbur pas përplasjes së jahtit të tij në brigjet franceze.
Në Azi, reshje të pazakonta dëbore mbuluan Japoninë dhe Korenë në fillim të shkurtit. Në qytetin Obihiro të Japonisë u shënuan 129 cm borë brenda vetëm 12 orësh. Në të njëjtën periudhë, Kentaki dhe shtetet përreth SHBA-së u përfshinë nga reshje të dendura dhe temperatura ekstreme, duke shkaktuar të paktën 14 viktima.
Ndërkohë, cikloni Zelia – një stuhi e kategorisë së pestë – goditi bregun perëndimor të Australisë, me erëra deri në 290 km/h. Dëmet ishin të kufizuara, por mijëra persona u evakuuan dhe pati ndërprerje të energjisë për rreth 250 mijë banorë.
Në Amerikën Latine, reshjet e marsit shkaktuan përmbytje katastrofike në Argjentinën Qendrore, me 16 viktima. Ndërkohë, Bolivia shpalli emergjencë kombëtare pas përmbytjeve të mëdha që lanë mbi 50 të vdekur dhe më shumë se 100,000 të zhvendosur.
Në Kinshasa, kryeqyteti i Republikës Demokratike të Kongos, shirat përmbytës në fillim të prillit shkaktuan vdekjen e të paktën 30 personave. Lumi Ndjili doli nga shtrati, duke përmbytur zona të populluara dhe shkatërruar qindra ndërtesa.
Shihni videon për një pasqyrë vizuale të kronologjisë së motit ekstrem në muajt e parë të vitit 2025.
(BalkanWeb)
