ELBASAN
Në shtatë bashkitë e Qarkut të Elbasanit ,Gramshi e ka rikonfirmuar edhe njëherë se mbetet një bastion i pathyeshëm i Partisë Socialiste.
Gazetari Fatmir Popja raporton për “Balkanweb” se në këtë bashki pjesëmarrja në këto zgjedhje ishte më e larta në shkallë qarku me 31.2% të numrit të përgjithshëm të votuesve.
Por nuk mbeten pas Librazhdi, Prrenjasi dhe Belshi. Në zgjedhjet e 30 Qershorit,Bashkia më e dobët me përqindjen më të ulët ishte Cërriku me 15.3% të pjesëmarrjes dhe më pas ajo e Peqinit.
Sipas informacionit paraprak në qarkun e Elbasanit pjesëmarrja në votime ishte 21.8% ose e përkthyer në shifra nga 343258 votues gjithsej, në votime morën pjesë 74835 persona. E shprehur në përqindje pjesëmarrja sipas bashkive ka qenë: Peqini 16%, Belshi 25.2%, Cërriku 15.3% , Elbasani 19.7%, Gramshi 31.2, Librazhdi 30.6%, Prrenjasi 27.2%.
Rreth mesnatës pas trajnimit të numëruesve nisi edhe procesi i numërimit ,ndërkohë që me vendim të KQZ, numërimi i votave për KZAZ nr 44 Peqin do të kryhet në Pallatin e Sportit “Tomorr Sinani” në qytetin e Elbasanit.Sipas të dhënave paraprake, të 7 bashkitë janë fituar nga kandidatët socialistë, ndërsa deri tani dy prej tyre , përkatësisht Prrenjasi dhe Cërriku qeveriseshin nga LSI ,ndërsa Peqini nga PDIU.
(d.xh/Balkanweb)