“BalkanWeb” zbardh detaje të reja nga grabitja e postës, mesditën e sotme, në Fushë Bulqizë, ku u morën 460 mijë lekë të rinj. Gazetari Enver Doçi sjell në redaksinë e “BalkanWeb” pamjet e para nga posta, që u grabit, e cila siç shihet, ndodhet brenda murit rrethues të shkollës fillore. Nga pamjet shihet se dera e postës është thyer, ndërsa në tokë është edhe gëzhoja e plumbit të automatikut, me të cilin ka qëlluar autori.
“Vetëm tre metra është shkolla fillore e ngjitur me postën. Për fat të mirë nxënësit kanë qenë në mësim dhe vetëm kanë dëgjuar zhurmën e krismës. Vetëm pak metra larg është edhe gjimnazi. Personi, pasi ka bërë terror, është larguar në disa rrugë nga ana e pasme e postës, ndërsa policia është në ndjekje të autorit. Ai ka goditur me tytën e automatikut xhamat, duke thyer derën dhe marrë paratë, për t’u larguar në drejtim të paditur.
Kjo është një zonë e populluar, pasi është gjimnazi dhe shkolla fillore, si dhe gjithë mosha e tretë vijnë këtu te lokalet. Jashtë kameras personat thonë se ka qenë një terror. Posta ndodhet brenda rrethimit të shkollës. Autorin e kanë parë duke u larguar nga pas postës, ka hipur në një pemë dhe ka kaluar murin rrethues. Dyshohet se ka pas dhe bashkëpunëtorë të tjerë.
Makina e postës është pikasur që kur është mbushur me lekët nga banka. Ndoshta ka pasur ndonjë sinjal se ‘u mbush makina, ndiqeni’”, tha gazetari Doçi për “BalkanWeb”.
(BalkanWeb)
