VLORË- Duket se në fshatrat e Fierit dhe Vlorës ka një situatë të rënduar nga përmbytjet. Vjosa është fryrë sërish për shkak të reshjeve në veri të Greqisë.
Gazetari Enrik Mehmeti ka qenë mbi lumin Vjosë për të parë nga afër situatën. Ai ka siguruar pamjet për “BalkanWeb” ku duken qartë përmasat e frikshme që ka marrë lumi Vjosë. Rryma e ujit gjithashtu është e fuqishme.
Ndërkohë gazetari Mehmeti ka folur me kryebashkiakun e Vlorës Dritan Leli i cili ka bërë një përmbledhje të situatës. Ai tha se situata është e ngjashme me atë të dhjetorit por se është nën kontroll. Një disfavor sipas Lelit duket se është drejtimi i erërave.
“Sasia e shirave e krahasueshme me të dhjetorit. Prurje të mëdha të lumit. Ka pasur fryrje të Shushicës. Disfavori më i madh është drejtimi i erërave. Ka një ngritje të nivelit të ujit të detit gjë që nuk ka qenë prezent në dhjetor. Pavarësisht kësaj, situata është nën kontroll. Janë rreth 30 banesa të evakuuara. Nuk kemi njerëz në rrezik”, deklaroi Leli, raporton “BalkanWeb”.
(m.k/BalkanWeb)
