Ministria e Jashtme e Rusisë tha të premten se një vendim për të hequr talebanët nga lista e organizatave terroriste ishte “marrë në nivelin më të lartë”, njoftoi agjencia shtetërore e lajmeve TASS.

Vendimi duhet të ndiqet me procedura të ndryshme ligjore në mënyrë që të bëhet realitet, citohet të ketë thënë përfaqësuesi special i presidentit Vladimir Putin për Afganistanin, Zamir Kabulov.

Putin tha në korrik se Rusia e konsideronte lëvizjen talebane të Afganistanit një aleat në luftën kundër terrorizmit.

Rusia ka ndërtuar ngadalë lidhjet me talebanët që kur mori pushtetin në Afganistan në gusht 2021, ndërsa forcat e udhëhequra nga SHBA u tërhoqën pas 20 vitesh luftë, por lëvizja është ende zyrtarisht e jashtëligjshme në Rusi.

Asnjë vend nuk i ka njohur zyrtarisht talebanët si udhëheqjen legjitime të vendit, megjithëse Kina dhe Emiratet e Bashkuara Arabe kanë pranuar ambasadorët e saj.

Rusia shtoi talebanët në listën e saj të organizatave terroriste në vitin 2003. Heqja e saj do të ishte një hap i rëndësishëm nga Moska drejt normalizimit të marrëdhënieve me Afganistanin