GREQI- Incidenti i ndodhur gjatë ditës së sotme në fshatin Bularat, ku Kostandinos Kaçifa hapi zjarr ndaj policisë, padyshim ka shtuar tensionet mes dy vendeve. Autoritetet përkatëse kanë zgjedhur të heshtin, duke u matur mirë në deklaratat që do të mbajnë, teksa qëndrimi i medias është mjaft i qartë.
Policia e Shtetit në reagimin e saj ka bërë me dije se edhe pse thirrjet për t’u dorëzuar ishin të shumta, 35-vjeçari nuk i ka marrë fare në konsideratë, ndërsa gjatë shkëmbimit të zjarrit ka mbetur i vdekur.
“Bularat, qëllon me armë ndaj policisë dhe terrorizon banorët”, ishte lajmi kryesor në të gjitha mediat shqiptare ditën e sotme.
Por çfarë shkruajnë mediat greke për këtë incident?
“Episod i rëndë me një ushtar grek në Gjirokastër: Ngriti flamurin grek, kapet nga policia dhe qëllohet”, është ky titulli i Protothema.
Në artikull shkruhet se: “ushtari grek ngriti flamurin në varrezat e ushtarëve grekë në kudër të përkujtimit të 28 tetorit. Policia shqiptare, ka hequr më vonë flamurin, me pretendimin se ai nisi të qëllonte me kallashnikov”.
Po këtij versioni i qëndron edhe “Skai”, duke u shprehur se “është ende e paqartë nëse ai ka qëlluar drejt policisë ose në ajër, ndonëse mediat shqiptare pretendojnë se ka qëlluar kundër forcave RENEA”.
“Mononews.gr” shkruan se policia shqiptare ka hequr flamurin e vendosur nga ushtari grek dhe ai i është përgjigjur duke qëlluar me armë.
“Ushtari grek ka vendosur flamurin në varrezat e ushtarëve grek, për të përkujtuar 28 tetorin. Sidoqoftë, policia shqiptare e cila ka hequr flamurin, është shfaqur sërish në vend. Më pas ushtari nisi të qëllojë më kallashnikov”.
Padyshim qëndrimi i mediave greke është i njëjtë, madje ato i kanë bërë thirrje edhe autoriteteve diplomatike të ndërhyjnë për të zgjidhur çështjen.
Burimi GSH: http://www.gsh.al/2018/10/28/shqiptaret-kerkojne-nje-koke-turku-cfare-shkruajne-mediat-greke-per-incidentin/?fbclid=IwAR0IkSyu_vZpazfjod-sC9jH2J0YY2UoPLRuB4EJxNn6cxXDfiOFA5qw-4k
