TIRANË
Mbrëmjen e djeshme kryeqyteti u trondit nga një atentat mafioz, ndërsa viktimë mbeti ish-efektivi i policisë, Santiago Malko. Kur kanë kaluar disa orë nga vrasja, Policia e Shtetit vijon hetimet intensive për zbardhjen e ngjarjes.
Ish-efektivi i policisë u qëllua me breshëri plumbash teksa po lëvizte me një makinë tip “BMW” në rrugën “Xhenfize Keko” në zonën e “Xhamllikut” në Tiranë. Disa minuta pas ngjarjes së rëndë, policia njoftoi për djegien e një mjeti në zonën e Ferrajt në periferi të Tiranës, ndërsa dyshohet se u përdor nga autorët gjatë ekzekutimit të 26-vjeçarit, Santiago Malko.
Gazetarja e “BalkanWeb” Dorjan Bezat ka raportuar se në lidhje me ngjarjen janë shoqëruar mbi 20 persona, përfshirë edhe familjarë, ku janë pyetur në lidhje me konfliktet e mundshme që mund të ketë pasur ish-efektivi i policisë. Ky veprim do të ndihmojë më pas organet e drejtësisë në zbulimin e autorëve. Gazetarja Bezat ka siguruar një video nga vendi ku u gjet i djegur një mjet tip “Benz Mercedes”, ndërsa aty duket që ka mbetur vetëm hiri. Kjo makinë dyshohet se u përdor nga autorët në atentatin e mbrëmjes së kaluar.
(n.m/BalkanWeb)
