Të tjera detaje dalin në dritë në lidhje me Noel Dishin, vrasësin e Vilson Tafçiut. Ky i fundit u vra në Astir më 20 janar. Teksa sot Dishi ka dalë para gjykatës, gazetarja e ‘News24’ dhe ‘BalkanWeb’ Klodiana Lala mëson se ai u mor peng dy vite e gjysmë më parë në Durrës.
Lala raporton se ai i mbajt në një bagazh makine nga tre persona dhe pas disa orësh u la i lirë në Vorë. Dosja e rrëmbimit u hetua nga Krimet e Rënda por me shkrirjen e tyre dosja i kalua në prokurorinë e Durrësit, ndërsa Dishi kishte vendosur që t’i falte autorët.
Ditën e ngjarjes Dishi ishte në prokurorinë e Durrësit ku dha deklarime për rrëmbimin. Nga salla e gjyqit ai dha detaje nga momentet pak para krimit, ndërsa deklaroi se mbrëmjen kur ndodhi ngjarja u telefonua nga Vilson Noka Tafciu dhe e lanë të takoheshin tek një lokal në zonën e Astirit. (Lokali ku ndodhi ngjarja).
“Debatuam dhe Vilsoni më tha se ‘do ta bëj me keq se sa ta kanë bërë. Do të mbaj në bagazh të makinës dhe do ta thyej koken’. Më pas edhe me shau. Tentova të largohesha, por ai vijonte me të njëjtën mënyrë. Atëherë e kam qëlluar. U trondita kur kuptova se çfarë bëra.”, tha Dishi. “Pasi e qëllova, u largova. Por asnjëherë nuk kam dashur që të vras shokun tim të fëmijërisë”, tha ai.
Ndërkohë, arma e krimit dhe celulari i Dishit nuk janë gjetur nga policia.
(BalkanWeb)
