TIRANË- Partia Demokratike ka dalë sot para mediave ku ka akuzuar kryeministrin Edi Rama se po mbron “anëtarët politikë të bandës së Fushë-Krujës”.

Deputeti i PD Gent Strazimiri i ka kërkuar disa përgjigje kryeministrit Edi Rama duke iu referuar pamjeve të filmuara nga kamerat e sigurisë në Fushë Krujë.

DEKLARATA
Edi Rama vazhdon të heshtë sepse nuk guxon të thotë të vërtetën e pranisë së Taulant Ballës, Artur Bushit dhe Rrahman Rrajës në policinë e Fushë Krujës në 21 korrik. Në praninë e tyre nënkomisar Emiljano Nuhu dëshmoi se u kërcënua me pistoletë në kokë brenda stacionit të policisë së Fushë Krujës që të ndalte përballjen me ligjin të djalit përdhunues të deputetit të Edi Ramës.

Për të mbrojtur anëtarët politikë të bandës së Fushë-Krujës Edi Rama mashtroi publikisht kur deklaroi se skandali u publikua fillimisht nga vetë Taulant Balla dhe jo nga intervista denoncim e policit Emiljano Nuhu të ndjekur këmba-këmbës nga banda.

Në këto 11 ditë makineria e tij e propagandës shpiku 4 alibi për Taulant Ballën që nga inaugurimet deri tek dalja për peshk ditën e 21 korrikut. Por pengut të krimit Edi Rama ia ka mbyllur gojën me një pyetje fare të thjeshtë: Çfarë tregojnë kamerat e sigurisë të stacionit të policisë së Fushë-Krujës? Pse hesht Edi Rama prej 11 ditësh për përmbajtjen e pamjeve të 21 korrikut që tregojnë kush ka hyrë e kush ka dalë në zyrën e oficerit të policisë Emiljano Nuhu? Kush po e detyron kryeministrin tonë gojështhurur të bëjë rolin e memecit?

Në stacionin e policisë së Fushë-Krujës i cili hidhet në erë me tritol një ditë po e një ditë jo, janë të paktën 8 kamera që filmojnë 24 orë në ditë. Qytetarët e dinë se nëse dëshmia e nënkomisar Nuhut do të ishte e pavërtetë, pamjet e 21 korrikut pa Taulant Ballën në Fushë-Krujë do të ishin të kudondodhura. Deri sa Edi Ramës t’i vijë goja nuk do t’i ndahemi këmba-këmbës këtij horri.

(m.k/BalkanWeb)