Avokati Gazmend Halilaj ishte i pari që zbuloi skandalin e përdhunimit të vajzës së mitur nga Drenasi, ku në këtë aferë ishin përfshi shumë persona.


Nga mësuesi deri tek hetuesit policor e mandej për të bërë skandalin edhe më të madh ishte përfshirë edhe një mjek.


Mirëpo, edhe pse ishte personi i parë që raportoi rastin në fjalë, Prokuroria nuk po e lë rehat. Njëherë e arrestuan dhe e mbajtën në paraburgim, ndërsa tash edhe i kanë ngritur aktakuzë.


Hakmarrja e aktakuzës

Avokati Halilaj i ka thënë gazetës “Bota sot” se, ngritja e aktakuzës ka qenë e pritshme, pasi prokurori që i ka ngritur aktakuzë është i njëjti ndaj të cilit kishte bërë një kallëzim penal në 25 shkurt të këtij viti.

Për të bërë më skandaloze këtë aktakuzë, avokati Halilaj thotë se, vepra për të cilin i është ngritur aktakuzë ndaj tij nuk gjendet fare në kodin penal.

Por, kjo nuk e ndal avokatin që të ngrisë sërish kallëzim penal, madje thotë se kjo e bën edhe më të fortë dhe do të godas përsëri.

“Prokuroria më ka ngritur aktakuzë për rastin që e kam zbuluar vet. Fillimisht më kanë ofruar beneficione që të ndalem, por nuk ia dolën, pastaj u munduan edhe të më eliminojnë, e as këtu nuk ia dolën, pas kësaj, më burgosën dhe më lanë pa bukë e ujë dhe pa ilaçe, vetëm e vetëm që të dorëzohen, por as këtu nuk ia dolën. E tash më ka ngritur aktakuzë prokurori që me datën 25. 02. 2019 i kam bë kallëzim penal, kurse të nesërm i njëjti më ka arrestuar pa asnjë ankues apo provë”, thotë Halilaj për gazetën “Bota sot”.

Prokuroria ngritë aktakuzë për veprën që nuk gjendet fare në Kodin Penal

Avokati shton se nuk frikësohet pas kësaj, as nuk shitet e as nuk do të dorëzohet derisa drejtësia të zbardhë këtë rast.

Ai tutje paralajmëron goditje tjetër të krimit sidomos të personave zyrtarë.

“Njerëzit vetëm pse po mendojnë ndryshe po i akuzojnë për terrorizëm dhe po i vrasin në burg. Kurse unë i kam goditur me prova dhe kjo ka qenë shumë e pritshme. Mirëpo, skandaloze është se Prokuroria më ka ngritur aktakuzë për veprën që nuk gjendet fare në Kodin Penal. Andaj, nuk kam qare pa e bë një kallëzim penal ndaj personave përgjegjës”, thotë tutje Halilaj.

Goditja e krimit

“Kam arritur ta shpëtojë vajzën nga kthetrat e personave zyrtarë dhe atyre me peshë. Me punën time, rrezikun tim, profesionalizimin tim kam arritur ta godasë këtë rast ani pse sot më kanë ngritur këtë aktakuzë”, shton ai.

Halilaj pohon se, vajza shumë herë është kanosur për ta denoncuar atë, por sipas tij ajo ka deklaruar edhe publikisht se atë e konsideron si vëlla.

“Vajza është kanosur nga ana e institucioneve dhe prokurorisë shumë herë që nëse nuk e denoncon edhe avokatin kemi me të shti në burg edhe ty. Mirëpo, ajo ka thënë se avokatin e kam si vëlla dhe që asnjëherë nuk është kanosur apo shantazhuar nga ana ime”.

Keqtrajtimi në burg

Halilaj ritheksoi se në burg u keqtrajtua.

“Mua më kanë arrestuar, më kanë lënë pa bukë, pa ujë dhe pa vetëdije me kanë dërguar në emergjencë. Kjo më është bërë në 48 orëshin e parë nga policia në stacion, ndërsa në gjashtë ditët tjera kam qenë pa ilaçe sepse truri pa ujë nuk ka pasë as oksigjen. Ka ardhur mjekja nga Prishtina dhe pasi më ka parë gjendjen jashtëzakonisht të rëndë shëndetësore, pastaj kanë reaguar edhe institucioni i Avokatit të Popullit dhe Këshilli për Mbrojtjen e Lirive dhe të Drejtave të Njeriut”.

“I kanë gjetur të gjitha dëshmitë sepse m’i ka kontrolluar mjekja të gjitha detajet dhe ka gjetur se nuk m’i kanë lënë ilaçet. Krejt këto m’i kanë bërë vetëm si presion për t’u tërhequr”.

Gjashtë të pandehurit për rastin e njohuri si “Drenasi” janë të dyshuar për veprat penale si: “Keqpërdorimi seksual duke keqpërdorur pozitën, autoritetin apo profesionin”, “Nxitja e akteve seksuale me premtim të rrejshëm të martesës”, “Shtytja në ndërprerjen e palejuar e shtatzënësisë” dhe “Frikësimi gjatë procedurës penale”./botasot

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb