Presidenti ukrainas Volodymyr Zelensky akuzoi sot Rusinë për planifikimin e sulmeve potencialisht katastrofike ndaj centraleve bërthamore ukrainase, në një fjalim në OKB, në të cilin ai denoncoi ofertat për të vendosur paqen nga jashtë.

Zelensky u përpoq të mblidhte mbështetje midis liderëve botërorë në mbledhjen e tyre vjetore në Nju Jork, ndërsa shqetësimet e tij rriteshin, javë përpara zgjedhjeve në SHBA që mund të ndryshonin ndjeshëm qëndrimin e mbështetësit kryesor të Ukrainës.

Duke folur nga foltorja e OKB-së, Zelensky tha se inteligjenca ukrainase ka zbuluar se Rusia po skanon infrastrukturën bërthamore të vendit me satelit. Presidenti rus Vladimir Putin “duket se po planifikon sulme ndaj termocentraleve tona bërthamore dhe infrastrukturës, duke synuar shkëputjen e termocentraleve nga rrjeti i energjisë”, tha Zelensky.

“Çdo incident kritik në sistemin energjetik mund të çojë në një fatkeqësi bërthamore, një ditë e tillë nuk duhet të vijë kurrë”, tha Zelensky. “Moska duhet ta kuptojë këtë dhe kjo varet pjesërisht nga vendosmëria juaj për të ushtruar presion mbi agresorin”, tha ai në Asamblenë e Përgjithshme.

Rusia pushtoi centralin bërthamor gjigant Zaporizhzhia menjëherë pas pushtimit të Ukrainës në shkurt 2022. Rusia javët e fundit ka goditur rrjetin elektrik të Ukrainës, në atë që zyrtarët perëndimorë dhe ukrainas e përshkruajnë si një përpjekje për ta lënë vendin duke u “dridhur” nga i ftohti gjatë dimrit.

Zelensky të enjten do të shkojë në Shtëpinë e Bardhë për të takuar presidentin Joe Biden dhe për të paraqitur atë që ai e përshkruan si një “plan fitoreje” për Ukrainën.