Analisti Agim Baçi, i ftuar në studion e News24 komentoi debatin në distancë mes kryeministrit Edi Rama dhe kreut të PD Lulzim Basha.
Baçi tha se kreu i Atlantikëve po provon diçka ndryshe për të pasur sukses. Ai shtoi se partitë e vogla po përpiqen të luftojnë të voglat.
“Basha ka qenë korrekt dhe me gjuhën dhe thuhej se ai është tepër serioz. Nuk ka asgjë në këtë debat virtual. Partitë e vogla po sulmohen, që mos prishin planet e partive të mëdha. Këtu futet edhe Basha, që luftohet nga të dy. Basha është treguar i matur dhe e ka mbajtur konfliktin me Ramën. Ndryshe nga artistët, politikani duhet të luftojë brenda një kohe të caktuar dhe prandaj Basha po provon dhe këtë mënyrë. Pra, Basha po provon diçka ndryshe për të pasur sukses. Rrjetet sociale janë të rëndësishme në fushatë elektorale”, tha Baçi.
Më tej, Baçi vlerësoi se Rama pikën më të dobët ka programin.
“Rama pikë më të dobët ka programin. Berisha e tha saktë se pika e dobët e Ramës është ana ekonomike. Rama thotë se do të jepet pasaporta e BE-së, por nuk kemi ndonjë siguri për këtë. Pas 12 vitesh në pushtet, shqiptarët sërish duan të ikin dhe kjo do të thotë se ekonomia është në duart e disa personave. Nuk shohim një debat të mirë për programet. Kryeministri në vend se të thotë se duam pasaportën e BE-së, duhet të forcojë pasaportën e Shqipërisë. Pasaporta e BE është një shpresë hipotetike”, u shpreh Baçi.
Duke folur për diasporën, Baçi u shpreh se vota e shqiptarëve që jetojnë jashtë vendit mund të bëjë diferencën.
“Diaspora mund të bëjë diferencën. Diaspora është e panjohur dhe nuk e kontrollojnë dot, siç i kontrollojnë në Shqipëri. Ne na duhet një parlament i përgjegjshëm, që të jenë në shërbim të qytetarëve. Sali Berisha bëri një listë kandidatësh politike”, përfundoi Baçi.
(BalkanWeb)
