Sekretari i Përgjithshëm i PD Flamur Noka gjatë takimeve elektorale të organizuara në fshatrat e Gramshti u bëri thirrje banorëve që t’i japin përgjigjen që meriton “Rilindjes”, pas shkatërrimit ekonomik, social dhe infrastrukturor që u ka bërë 12 vite.

Pasi takoi me qindra qytetarë dhe vizitoi fshatrat Skënderbegaz dhe Cërunjë Noka e quajti poshtëruese që gramshiotët të mashtrohen sy për sy nga Rama.

Noka vuri theksin te plaga e kësaj zone të bekuar nga natyra, largimi masiv i rinisë, shkatërrimi i sistemit arsimor, vjedhjen e subvencioneve dhe mashtrimin e madh, shëndetësinë falas e cila nuk ndodhi kurrë me “Rilindjen”.

“Ju, keni një gjë për t’i dhënë politikës, për të na dhënë votën. Pushteti ka detyrë t’ju japë shërbime, përkujdesje, t’ju ndërtojë infrastrukturën.

Ju keni detyrë të paguani taksat, pushteti ka detyrë t’ju rrisë rrogat, t’ju rrisë pensionet, ndihmën ekonomike, subvencionet, t’ju ndërtojë rrugët, t’ju sistemojë shkollat, qendrat shëndetësore, mjekun, infermierin e të gjithë.

A ju ka ndodhur në këto 12 vite me qeverinë?

Jo, kurrë! As ka dashur kush nga pushetti, përveçse vetëm kur vijnë votat vijnë për t’ju blerë me miell, me 50 mijë lekë, etj.

Por kjo, është poshtëruese.

Këta që nuk kanë bërë asgjë për 12 vite, as në bashki, as në qeveri, a mund të shpresojë kush të bëjnë diçka për 4 vite?

Se po të kishin bërë në 12 vite, 1, 2, 3, 4, 5, 6 gjëra, do themi po, hajde t’ju japim të bëjnë dhe 1, 2, 3.

Po këta, në 12 vite asgjë. Vetëm vidh, vidh, vidh, dhe tani thotë: na jepni dhe 4 vite kohë që të vjedhim, se ça do bëjnë?

Mendoni për veten tuaj!

A ua kanë rritur rrogat në 12 vite? A ju futi në punë, se premtoi vende pune. Atë shëndetësi, a ua dha falas, që ju mashtroi? Jo!

Shkollat, i rregulloi? I ka shkatërruar! Çfarë ka bërë?

A ju ka dhënë subvencione? Ja gjithë këto fshatra, gjithë këto toka fantastike. Ju ka ndihmuar gjë për bujqësinë? Jo!

Atëherë, për çfarë ju duhet ky?

Ndërsa se, po vijmë me një program. Ne ju themi: 200 euro do të jetë minimumi jetik. Pra, nuk do të ketë ndihmë ekonomike nën 200 euro. Nuk do të ketë pension nën 200 euro. Nuk do të ketë bursë për studentët nën 200 euro.

Vendet e punës. 500 euro do të jetë rroga minimale, 1200 euro do të jetë rroga mesatare. Nuk do të ketë mësues, edhe këtu në fshatin tuaj që do të ktë rrogë nën 1000 euro.

Pse?

Sepse duhen shkolluar këto të rinj e të reja.

Po kur mësuesin e merr e fut patronazhist, se merr e bën gjithë ditën politikë partie dhe nuk di të lidh dy fjalë për të mësuar fëmijët. Fëmijët pastaj, dalin të paaftë për nesër dhe na merr mëqafë të gjithëve ne.

Po çmimi i energjisë, sa do të jetë?

7 lekë kilovati.

Të gjithë do të fitoni. Po, ju të gjithë këtu, siç jeni, do të keni Kartë Konsumatori, që kur të shkoni të blini, do të rregjistrohet karta në çdo blerje, dhe në fund do t’ju rimbursohet TVSH-ja.

Dhe, është e llogaritur që janë 450 mijë lekë në vit është rimbursimi i TVSH-së, për sa ka fuqi një çift pensionistësh të blejë ushqime në vit.

Po, nuk është pak. Do të flaen të gjitha kamatëvonesat e dritave dhe të ujit. Do të falen të gjitha gjobat. Po do të përfundojnë të gjitha legalizimet.

Pra, ju ju duhet një qeveri që mendon për ju dhe që qeveris me zemër.

Po, pse Sali Berisha është i besueshëm, dhe ne jemi të besueshëm?

Ja, po ua them unë.

Sepse, ne kemi vërtetuar, kemi patur gjysmën e këtij buxheti kur ishim në pushtet, ama ndërtuam 11 mijë kilometra rrugë, tunele e autostrada. Të gjitha i ndërtuam ne. Ndërtuam mbi 1000 shkolla, ujëshjellësa.

Po, sa kilometra rrugë kanë bërë këta?

Këta, 3 kilometra i kanë bërë në rrugën tuaj që vjen këtu që, i ka bërë Anastas Angjeli, dhe 1 kilometër në një komunë tjetër.

12 vjet, 4 kilometra rrugë kanë shtruar në të gjithë Gramshin.

Çfarë bëri Sali Berisha? Bëri vepra gjigande! Solli asfaltin deri këtu, në Kodovjat, dhe ndërtoi gjithë atë hidrocentral. Ju dha subvencione për ullintë, të cilat do të ua kthejë prapë, dhe do të trefishohen subvencionet”, tha Sekretari i Përgjithshëm i PD, Flamur Noka.

(BalkanWeb)