Raportuesi special i OKB-së për të drejtat e njeriut në luftën kundër terrorizmit, Ben Saul, kritikoi të hënën veprimet ushtarake të Izraelit në Gaza dhe u bëri thirrje të gjitha kombeve të ndalojnë furnizimin me armë, duke përmendur shkeljet e ligjit humanitar.

Duke folur në një konferencë shtypi në Nju Jork, Sauli theksoi “një model të sulmeve të qëllimshme pa dallime dhe joproporcionale që dëmtojnë një numër të madh civilësh” nga Izraeli.

Sauli e përshkroi përdorimin e “municioneve me eksploziv të lartë në zona me popullsi të dendur, të cilat nga natyra nuk mund të bëjnë dallimin midis objektivave civilë dhe ushtarakë” dhe përdorimin e tij të urisë si dhe mohimin e ndihmës si një “armë lufte”.

Duke theksuar shqetësimet për veprimet e Izraelit që shkelin normat ndërkombëtare, Saul ripohoi thirrjen “të gjitha shtetet të mos ofrojnë armë ose municione për Izraelin, sepse kjo do të shkelte detyrimin e shteteve të tjera për të garantuar respektimin e ligjit humanitar”.

Ai gjithashtu shprehu zhgënjimin me shpërfilljen e Izraelit ndaj thirrjeve të përsëritura nga organet ndërkombëtare për të respektuar ligjin humanitar.

“Për fat të keq, Izraeli nuk e ka marrë mesazhin nga Këshilli i Sigurimit, Gjykata Ndërkombëtare e Drejtësisë, prokurori i Gjykatës Ndërkombëtare Penale, shumë qeveri, Asambleja e Përgjithshme dhe Këshilli i të Drejtave të Njeriut”, tha ai.

Sauli sqaroi më tej dallimin midis rezistencës legjitime dhe terrorizmit, duke thënë se sipas ligjit ndërkombëtar, njerëzit që përballen me pushtimin ose kolonializmin kanë të drejtë të rezistojnë.

Ai theksoi se “kjo e drejtë rezistence duhet të ushtrohet në përputhje me të drejtën ndërkombëtare humanitare”, duke shtuar se “çlirimi kombëtar dhe vetëvendosja është një kauzë e drejtë, por…nuk mund të vrasësh civilë apo të sulmosh qëllimisht civilë apo të marrësh pengje. ”

Saul tha se “këto janë vija të kuqe në të drejtën ndërkombëtare për të gjithë”, duke nënvizuar rëndësinë e mbajtjes së këtyre standardeve në të gjitha konfliktet.

(A.A/BalkanWeb)